Игіліктің бірден-бір жолы – кәсіппен айналысу

Аудан әкімі Мирхан Дуанбеков Аманкөл, Тәуіп және Жайсаңбай селолық округінің халқымен кездесіп, өткен жылы атқарылған жұмыстарды қорытындылап, алдағы жылы атқарылар жұмыстар легімен таныстырды.
Бұл жолғы сапар Аманкөл селолық округінің орталығы Құтикөл ауылында басталды. Құрамында Құтикөл, Аманкөл және Жарма ауылдары бар округ тұрғындарының жылдан-жылға әлеуметтік дамуы мен әлеуетінің артып келе жатқаны көзге көрініп тұр. Селолық округ орталығы Құтикөлде 150 орындық жаңа жобадағы мектептің құрылысы басталып, үстіміздегі жылы пайдалануға берілмек. Сонымен қатар, жеке тұрғын үйлер салынып, үй-жайларын күрделі жөндеуден өткізіп, көшелердің ретке келтірілуінің өзінен-ақ тұрғындардың тұрмысының түзеліп, болашаққа деген ұмтылыстың барлығы көңіл қуантады. «Көркейе бер, туған жер!» акциясы аясында Жарма ауылынан жергілікті азаматтардың демеушілігімен клуб үйінің іргетасы қаланып, құрылысы басталмақшы. Кездесу барысында тұрғындар тарапынан көтерілген өзекті мәселелер де болды. Мәселен, қазіргі уақытта тұрғындарды түз тағысы қасқырдың көбейіп кетуі алаңдатып отыр. Сонымен қатар, Жармалық тұрғындар ауылдағы жалғыз құдықтың толыққанды қызмет көрсете алмай отырғандығын алға тартты. Аудан әкімі бұл айтылған мәселелердің ескерусіз қалмайтындығын, тиісінше көмек көрсететіндігін айтты.
Ал, Тәуіп пен Жайсаңбай тұрғындары үшін де әлеуметтік мәселелер жылдан-жылға шешімін тауып келеді. Өткен жылы екі өңірге де маңызды Қыл бөгетінің құрылысы аяқталды. Тәуіп селолық округінің орталығы Құйлыс селосынан 150 орындық мектептің құрылысы басталып, осы жылы пайдалануға берілмек. Ал, Жайсаңбайдан 60 орындық мектептің құрылысы басталып, үстіміздегі жылы пайдалануға беріледі деп күтілуде. Жайсаңбайлықтарды көп жылдардан бері толғандырып келе жатқан ауыз су мәселесі төңірегінде аудан әкімі: «Жайсаңбай селосын сумен жабдықтау жүйесінің құрылысын салу жобасының жобалау сметалық құжаты дайындалып, мемлекеттік сараптамаға ұсынылды. Құрылыс жұмысына қаражат бөлінуіне жұмыстар жүргізіліп жатыр. Су мәселесінің шешімін табар күн де алыс емес деген сенімдеміз» деп, жауап берді.
Аудан әкімі М.Дуанбеков ел тұрғындарымен есепті кездесуінде халықтың тұрмыс-тіршілігін артыру мақсатында елдегі қолға алынып жатқан жұмыстарға тоқтала келе, жұртшылықты кәсіпкерлікпен айналысуға шақырды. Қазіргі мемлекетіміздің басты ұстанымы да елдегі шағын және орта кәсіпкерлікті дамыту. Осы мақсатта үкімет тарапынан көрсетіліп жатқан қолдау мен көмек жетерлік. Талпынып, талап қылған адамға қандай тараптан да көмек көрсетілетіндігіне назар аударды.