Ұлттық кеңес туралы

Мұхтар Тайжан: Ұлттық кеңес жұмысына атсалысуға дайынмын
Ұлттық қоғамдық кеңестің мүшесі Мұхтар Тайжан ұйымға кірудегі өзінің мақсаттарын айтты, деп хабарлайды ҚазАқпарат тілшісі. Қоғам қайраткері Мұхтар Тайжан Ұлттық қоғамдық кеңес шынайы диалог алаңына айналады деген пікір білдірді. «Өз басым бұрыннан айтып келе жатырмын. Билік пен қоғам арасында диалог құратын жүйе болу керек. Сондықтан, биліктің нақты осы қадамын қолдаймын. Мұндай тұрақты түрде жұмыс істейтін жиын бәрімізге қажетті деп білемін. Біздің Қазақстанымыз болашақта өркениетті, құқықтық, демократиялық, шынайы нарықтық мемлекетке айналуы керек. Бұл кеңеске кірудегі өзімнің мақсатым осы. Біз келешек ұрпаққа өте өркениетті мемлекетті қалдырып кетуіміз қажет. Осы кеңес сол басты мақсатымызға нақты қадам болады деп үміттенемін. Сондықтан өз басым кеңестің жұмысына атсалысуға дайынмын», - деген саясаткер кеңестің жұмысы ашық болатынына сенім білдірді. «Біздің жұмысымыз міндетті түрде ашық болады. Өз мақсатымызды өзгертпейміз. Бірте-бірте ортақ мақсатқа жетеміз деген үміт бар. Ең бастысы, кеңестің жұмысында ешқандай шеңбер жоқ. Ел өмірін жақсартуға қатысты шаруалардың бәрін қамтитын болады», - деді Мұхтар Тайжан.
Бізде ситуациялық лидерлер көп – Ерлан Қарин
Ұлттық қоғамдық кеңестің хатшысы Ерлан Қарин жаңадан құрылған ұйымның бұған дейінгі диалог алаңдарынан айырмашылығы неде болатынын түсіндірді, деп хабарлайды ҚазАқпарат тілшісі. Орталық коммуникациялар қызметінде өткен брифинг барысында БАҚ өкілдерінің сауалына жауап берген Ерлан Қарин ұйымның бұған дейін жұмыс істеген диалог алаңдарынан ауқымдылығымен ерекшеленетінін атап өтті. «Кейбір сарапшылардың әлеуметтік желілерде Ұлттық кеңесті бұған дейін құрылған диалог алаңдарымен салыстырмалы түрде талдап жатқанын мен де байқадым. Бұл теңеулер дұрыс емес. Себебі ол алаңдар нақты бір мәселе төңірегінде құрылған уақытша диалог алаңдары болатын. Мысалы, Жер комиссиясы жер туралы заңнамаға өзгерістер енгізу мақсатында құрылған алаң болатын. Ал бұл (Ұлттық кеңес - авт.) тұрақты түрде жұмыс істейтін консультативтік кеңес органы болады. Президентке үнемі қоғамдағы әртүрлі алаңдататын мәселелерді ескеруге, қоғам өкілдерімен тікелей диалог арқылы пікір алмасу барысында тиісті бастамаларды жүзеге асыруға мүмкіндік беретін болады», - деді ол. Ұлттық кеңес хатшысы ұйымның құрамын анықтау кезінде тұрақты түрде қоғамдық мәселелермен шұғылданған, өз саласының мамандарын тартуға басымдық берілгенін айтты. «Қазір бізде ситуциялық лидерлер көп. Ал біз тұрақты түрде елмен жұмыс істеп жүрген адамдарды тартуға тырысты. Сонымен қатар оның өз саласындағы біліктілігі де ескерілді. Тек «күйіп тұрға тақырыптармен» ғана шұғылданбай, өз мақсаты мен міндетін айқын атқаратын адамдарды топтастыруға тырыстық», - деді Ерлан Қарин. Еске сала кетсек, бүгін Мемлекет басшысы Қасым-Жомарт Тоқаев Ұлттық қоғамдық сенім кеңесі туралы Жарлыққа қол қойды. Сондай-ақ кеңестің құрамына кімдер енгені белгілі болды.
Ұлттық кеңес қазақстандық қоғамның демократиялық дамуға дайын екенін көрсетеді
Қазақстан халық Ассамблеясының мүшесі, «Жаңғыру жолы» жастар қозғалысының төрағасы Максим Споткай Ұлттық қоғамдық сенім кеңесінің құрылуы туралы пікір білдірді, деп хабарлайды ҚазАқпарат тілшісі. «Мемлекет басшысы өзінің ұлықтау рәсімінде Ұлттық қоғамдық сенім кеңесінің құрылатынын хабарлаған еді. Сөзсіз, кеңестің басты мақсаты – қоғамдық диалог үшін тиімді алаң құру болып саналады. Бұл өте қалыпты жағдай, өйткені бүгінде алуан түрлі мәселелер бойынша түрлі сұрақ бар. Адамдардың пікірі ресми ұстаныммен үнемі сәйкес келе бермейді», - деді Максим Споткай. Сонымен бірге, ол кеңестің басты артықшылықтары туралы айтып берді. «Қоғамдық кеңестің ең басты артықшылығы – өркениетті түрде мәміле жасай алуымыз болуы керек. Біздегі ахуал қоғамның өзгергенін, барлық адамдардың, оның ішінде биліктің өзгеріске дайын болуы қажеттігін көрсетті. Ұлттық қоғамдық сенім кеңесі қазақстандық қоғамның алдағы демократиялық дамуға дайын екенін, бір-бірімен ашық сөйлесіп, мәміле жасай алатынын көрсетуі тиіс», - деді спикер. Айта кетейік, Мемлекет басшысы Қасым-Жомарт Тоқаев Ұлттық қоғамдық сенім кеңесі туралы Жарлыққа қол қойды. Бұл туралы Президент 2019 жылдың 12 маусымында елордадағы ұлықтау рәсімінде мәлімдеген болатын.
Ұлттық қоғамдық кеңес құру бүгінгі күнің талабы - Асылбек Қожахметов
Ұлттық қоғамдық сенім кеңесінің мүшесі, қоғам қайраткері Асылбек Қожахметов жаңа құрылған кеңеске жүктелген жауапкершілік мол екенін айтты, деп хабарлайды ҚазАқпарат тілшісі. «Ұлттық қоғамдық сенім кеңесін құру бүгінгі күнің талабы. ҚР Президенті Қасым-Жомарт Тоқаев Жарлыққа қол қойды. Бұл - өте маңызды бастама. Еліміздің дамуына өзіндік үлес қосады», - дейді Асылбек Қожахметов. Оның айтуынша диалог алаңы қазіргі қоғамға қажетті. «Ұлттық қоғамдық сенім кеңесін құру бұл үлкен шаруа. Бұл халыққа қажет деп есептеймін. Билік пен халық арасында байланыс орнайды. Кеңес мүшелері өздеріне жүктелген жауапкершілікті түсінеді деп сенемін. Бәрі алғашқы отырыстан кейін белгілі болады. Ең бастысы Ұлттық сенім кеңесін Президент өзі басқарады, демек атқарылатын шаруалар 100% нәтижелі болмақ», - дейді Асылбек Қожахметов. Айта кетейік, Мемлекет басшысы Қасым-Жомарт Тоқаев Ұлттық қоғамдық сенім кеңесі туралы Жарлыққа қол қойды. Бұл туралы Президент 2019 жылдың 12 маусымында елордадағы ұлықтау рәсімінде мәлімдеген болатын. Ұлттық кеңеске түрлі салада жұмыс істейтін, азаматтық белсенділік танытқан 41 адам мүше атанды.